ەل ەرتەڭىن بۇگىن ويلاساق ۇتامىز
قازاقستان حالقى اسسامبلەياسى كەڭەسى مۇشەلەرىنىڭ ۇندەۋىن قولداعان وتانداستارىمىزدىڭ ورتاق ويى وسىنداي قازاقستان حالقى اسسامبلەياسىنىڭ كەڭەسىنىڭ ۇستىمىزدەگى جىلى مەرزىمىنەن بۇرىن پرەزيدەنتتىك سايلاۋ وتكىزۋ تۋرالى باستاماسى قۇپتارلىق ءىس دەپ بىلەمىز. پرەزيدەنتتىك سايلاۋدى وتكىزۋدىڭ ماڭىزدىلىعىن كەڭەس مۇشەلەرى: «ەلباسىنا سەنىم مانداتىن ءبىلدىرۋ ارقىلى الەمدىك دامۋدىڭ جاڭا كەزەڭىندە حالقىمىزدى بىرىكتىرىپ, مەملەكەتتى دامىتۋداعى ماڭىزدى ماسەلەلەرگە دەن قويۋعا مۇمكىندىك الامىز», دەپ انىق كورسەتىپ وتىر. ەلىن سۇيگەن ەر بولسا, ول – ەلباسى. مەملەكەتىمىزدىڭ تاۋەلسىزدىكتىڭ تال بەسىگىندە تەربەتىلۋى, كۇنى بۇگىنگە دەيىنگى قول جەتكىزگەن تولايىم تابىستارى, مامىراجاي تىرلىگى, الدەنگەن الەۋەتى, قارىشتاعان ەكونوميكاسى – ەلباسىنىڭ بىرەگەي باتىل شەشىمدەرى مەن ساياساتىنىڭ جەمىسى. ەلىڭدى سۇيسەڭ, ەرلىك ىستەيسىڭ, دەگەن. ءبىز حالقى ءۇشىن تالاي تاۋەكەلگە بارعان نۇرسۇلتان ءابىش ۇلىنىڭ مارتتىگىن ەرلىككە بالايمىز. ويتكەنى, ەلباسى مەملەكەتىمىزدىڭ قانات جايۋى جولىندا جانكەشتى ەڭبەك ەتتى. ەلىمىزدىڭ ساياسي بەدەلىن كوتەرە ءبىلدى. ارينە, بۇل كۇندە ءبىز ەگەمەندىكتىڭ ەلەڭ-الاڭ شاقتارىنداعى قيىندىقتاردى ۇمىتا باستادىق. جايلى ءومىردىڭ راحاتىندا رياسىز كۇن كەشىپ كەلەمىز. قازىرگى ۇرپاق دامۋدىڭ داڭعىل جولىنا تۇسكەن, بولاشاعى جارقىن, جولى نۇرلى قازاقستاندى بىلەدى. حالقىمىزدى تورتكۇل دۇنيەگە تانىتقان ەلباسى نۇرسۇلتان نازارباەۆ ەكەنىن بىلەدى. ەلىمىزدى تاتۋلىقتىڭ, دوستىقتىڭ, ىنتىماقتىڭ مەكەنى دەپ تانيدى. تورتكۇل دۇنيەگە تانىمال بولعان شاقتا تاڭداي قاعارلىق جەتىستىگىمىزدى ەلباسى ودان ءارى ەسەلەسە, بۇگىنگى تىرلىگىمىز گۇلدەنە بەرەر ەدى. كەلەر ۇرپاقتىڭ تاعدىرىنا سەنىمدى بولار ەدىك. ەلىمىز ۇلان-بايتاق كەڭىستىكتە قۋاتى ارتقان بەدەلدى مەملەكەت بولىپ, دامىعان ەلدەر قاتارىنان كورىنەر ەدى. ىشكى بەيبىت ءومىر مەن ۇلتتىق رۋحىمىز اسقاقتاي تۇسەر ەدى. سوندىقتان ءبىز الداعى ۋاقىتتا دا ەلباسىمەن بىرگە قادام باسۋدى تىلەيمىز. مەرزىمىنەن بۇرىن پرەزيدەنتتىك سايلاۋ وتكىزىپ, ەلباسىمىزدىڭ سىندارلى ساياساتىن تولىعىمەن جۇزەگە اسىرۋعا ءمۇمكىندىك تۋدىرۋدى ويلايمىز. بۇل – باردى باعالاعان, اسىلىن ارداقتاعان كوكىرەك كوزى وياۋ, حالقىنا جانى اشىعان بارشا ازاماتتىڭ ماقساتى بولۋى ءتيىس دەپ سانايمىز. مەملەكەت كوشىن ءبىر بەلەستەن ەكىنشى بەلەسكە بيىكتەتىپ جۇرگەن ەلباسىن تەك قازاقستاندىقتار عانا ەمەس, الەم ساياساتكەرلەرى, ادۋىندى مەملەكەت پرەزيدەنتتەرىنىڭ ءوزى مويىنداپ وتىر. سوڭعى كەزدەرى ورىن الىپ جاتقان مەملەكەتارالىق ساياسي وقيعالاردىڭ بەيبىت جولمەن شەشىلۋىنە تاجىريبەلى ساياساتكەر, پاراساتتى پرەزيدەنت رەتىندە نۇرسۇلتان ءابىش ۇلى ۇلكەن ۇلەس قوسۋدا ەكەنىن دە كورىپ ءجۇرمىز. ەلباسىنىڭ تاۋەلسىزدىك العان 23 جىلدان بەرگى اتقارعان قاداۋ-قاداۋ ىستەرىن قاشاندا قاداپ ايتساق ارتىق ەمەس. ول ەگەمەن قازاقستاننىڭ تاريحىندا سايراپ جاتىر. حالقىن سوڭىنان ەرتە بىلگەن, ەلى ءۇشىن باسىن مىڭ قاتەرگە تىككەن ەلباسىن ەلى قولدايدى. ەلىن نۇرلى بولاشاققا جەتەلەگەن, سان عاسىرلار بويعى بابالار ارمانىن باياندى ەتكەن ەلباسى حالقىنا كوشباسشى بولۋعا لايىق تۇلعا. قازاقستاندىقتاردىڭ ءومىرىن جاقسارتۋ جولىندا قازىرگى ۋاقىتتا كوپتەگەن ۇزاق مەرزىمدى باعدارلامالار جۇزەگە اسىپ جاتىر. ساياساتتا, مادەنيەتتە, ەكونوميكادا, ءبىلىم-عىلىمدا, الەۋمەتتە قولعا الىنعان باستامالاردىڭ باياندى بولعانى حالىق ءۇشىن وتە ماڭىزدى. «ەلىم ءۇشىن, حالقىم ءۇشىن, قازاقستانىم ءۇشىن تاريحتىڭ قاي سىناعىنا دا تاۋەكەل دەپ باس تىگۋگە دايىنمىن», دەگەن ەلباسىنا تىرەۋ بولۋ, ونىڭ باستامالارىنىڭ جالعاسىن تابۋى ءۇشىن, بولاشاعىمىزدىڭ نۇرلى, ەلىمىز ماڭگىلىك بولۋى ءۇشىن مەرزىمىنەن بۇرىن پرەزيدەنتتىك سايلاۋ وتكىزۋگە دايىن بولۋىمىز كەرەك. پرەزيدەنتپەن بىرگە حالىقتىڭ الار اسۋى ءالى الدا دەپ ءبىلەمىز. بارشا قازاقستان حالقىنىڭ جۇرەگىنە جول تابا بىلگەن ەلباسىنىڭ حالقى ءۇشىن ايانباي قىزمەت ەتەتىنىنە كامىل سەنەمىز! ءابدىماناپ بەكتۇرعانوۆ, ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى, زاڭ عىلىمدارىنىڭ دوكتورى, پروفەسسور, ۇعا كوررەسپوندەنت-مۇشەسى. تالدىقورعان.بيىكتەردى بىرگە باعىندىرامىز!
ءتاڭىردىڭ سىيىنا اينالعان تاۋەلسىزدىكپەن قاۋىشقان جىلداردان بەرگى ارالىقتا الماعان اسۋىمىز, باعىندىرماعان بيىگىمىز جوق تا شىعار. سوقتىقپالى-سوقپاقتى سان الۋان كەزەڭدەردى باستان وتكەرگەن قازاق ەلىنىڭ ەكونوميكاسى دا, مادەنيەتى دە, سپورتى دا قارىشتاپ دامۋدىڭ جولىنا ءتۇستى. ونىڭ ءبارى كورەگەن كوشباسشىمىز نۇرسۇلتان نازارباەۆتىڭ سارابدال ساياساتىنىڭ, قامقورلىعىنىڭ ارقاسى, ارينە. لوندون تورىندە قازاق سپورتشىلارى اتوي سالدى. جەتى التىن تۇگىلى بۇرىن-سوڭدى ءبىزدىڭ ەلدىڭ سپورتشىلارى وليمپيادادان ءتورت التىن العان ەمەس. تولايىم تابىس پا, تابىس. ماقتانۋعا بولا ما, بولادى. ەڭبەك بار جەردە ناتيجە بولادى. قولداۋ بار جەردە سپورتشى دا داميدى. سپورتقا سالىنعان ينۆەستيتسيا ءوزىن اقتاعانى وسى ەمەس پە؟ ءبىز دە تاۋ تۇلعا اعالارىمىزدان ءتالىم الىپ وستىك. وليمپيادا شىڭىن باعىندىرعان باتىر اعالارىمىزدى ۇلگى تۇتتىق. سول ارقىلى ءوزىمىزدى قايرادىق. قازاق ەلىنىڭ قالقانى بولۋعا بارىمىزدى سالىپ كەلەمىز. جاقىندا عانا قازاقستان حالقى اسسامبلەياسى كەڭەسىنىڭ وتىرىسىندا ەلىمىزدە كەزەكتەن تىس پرەزيدەنتتىك سايلاۋ وتكىزۋ تۋرالى ۇسىنىس ايتىلىپ, ول كەڭىنەن قولداۋ تاپتى. ءبىز دە قولدايمىز, قۋاتتايمىز. قازاق «قۇداي قالاعان حان بولادى» دەپ جاتادى. ەلباسىمىز نۇرسۇلتان نازارباەۆ ەلىمىزدى وتپەلى كەزەڭنەن ەرلىككە پارا-پار شەشىمدەرىمەن الىپ شىقتى. جەر جاھانداعى بولىپ جاتقان قيىندىق, داعدارىس اتاۋلىنى سەزبەي دە قالدىق. الەم ەلدەرى قازاقستاندى تۇبەگەيلى مويىندادى. ول ەڭبەك البەتتە ولشەۋسىز. ءبىز دە سپورتشى رەتىندە الەمدە بەلەڭ الىپ جاتقان سوڭعى جاعدايلاردى ءبىلىپ وتىرمىز. سوندىقتان دا اتالعان ۇسىنىستى قولدايمىز. جۇرت دەگەندە جۇمىلاتىن حالىق تا بۇل ۇيعارىمدى قولدايتىنىنا سەنەمىن. الدا تالاي ابىرويلى سىندار, ايتۋلى دودالار توسىپ تۇر. ول جەردە ەلدىڭ ەلدىگى, ەردىڭ ەرلىگى سىنعا تۇسەدى. سول سىناقتاردان پرەزيدەنتپەن بىرگە مۇدىرمەي وتەرىمىزگە سەنىمىمىز كامىل. بارىمىزگە دە الدىمەن اللا جار بولسىن! جاسۇلان قىدىرباەۆ, اۋىر اتلەتيكادان الەم چەمپيونى. جامبىل وبلىسى.ەرتە قامدانعاننىڭ ەسەسى كەتپەيدى
ەلىمىز الەۋمەتتىك-ەكونوميكالىق جانە ساياسي رەفورمالار جۇرگىزۋ بارىسىندا باتىل قادامدارعا بارىپ, كەڭ اۋقىمدى جۇمىستار جاساپ, سونىڭ ناتيجەسىندە ۇلكەن جەتىستىكتەرگە قول جەتكىزدى. قازاقستان – الەمدىك ارەنادا ءوزىنىڭ ورنىن ويىپ تۇرىپ الدى. بۇگىندە جەر جاھاننىڭ بەلدى مەملەكەتتەرى ءبىزدىڭ ەلمەن ساناسادى. كوپتەگەن ماسەلەلەردە اقىلداسىپ وتىرادى. قازاقستاندا زاماناۋي مەملەكەتتىلىكتىڭ بەرىك ىرگەتاسى قالانىپ, ەلدىڭ اۋماقتىق تۇتاستىعى قامتاماسىز ەتىلدى. ەل جەدەل دامۋدىڭ داڭعىل جولىنا ءتۇسىپ, الەمدىك ەكونوميكانىڭ اجىراماس بولىگىنە اينالدى. قازاقستان – تابىستى, ديناميكالىق سيپاتتا دامىپ, الەمدىك ۇدەرىستەرگە ىقپالى بار ىرگەلى مەملەكەتكە اينالدى. تۇراقتى ىشكى ساياسي احۋال, ۇلتارالىق تاتۋلىق پەن دىنارالىق كەلىسىم, ساپالى مەملەكەتتىك باسقارۋ – وسىنىڭ ءبارى ەلباسى نۇرسۇلتان نازارباەۆتىڭ تاباندى دا ساليقالى تۇردە جۇرگىزىپ وتىرعان ساياساتىنىڭ ناتيجەسى. بۇل – ادامنان جاسىرعانمەن, اللادان جاسىرا المايتىن شىندىق. قازىرگى الەمدىك داعدارىس پەن كورشى ەلدەردەگى ەكونوميكانىڭ قۇلدىراۋى كوپ نارسەگە كوزىمىزدى جەتكىزىپ وتىر. وسىندايدا ەلىمىزدەگى بەرەكە مەن شارۋا ادامىنا دەگەن قامقورلىقتىڭ قانشالىقتى قىمبات ەكەنىن انىق تۇسىنەمىز. وسى جولدان تايماي, كوتەرىلگەن بيىكتەن تومەندەمەي, العا جىلجۋ ءۇشىن بىزگە تۇراقتىلىق پەن سەنىمدىلىك اۋاداي قاجەت. سوندىقتان «ابزال جانە ك» تولىق سەرىكتەستىگىنىڭ ۇجىمى اسسامبلەيا كەڭەسىنىڭ كەزەكتەن تىس سايلاۋ وتكىزۋ تۋرالى باستاماسىن تولىقتاي قولدايدى. ءبىز مەملەكەت باسشىسىنىڭ اۋىل شارۋاشىلىعىن دامىتۋ, اگروونەركاسىپ كەشەنىن قولداۋ باعىتىنداعى قامقورلىعىن كورىپ كەلەمىز. 360 ادام جۇمىس جاسايتىن مەكەمە وتكەن جىلى 5500 گەكتارعا كۇرىش داقىلىن ەگىپ, كۇرىشتىڭ ءار گەكتارىنان 60 تسەنتنەردەن استام ءونىم جينادى. كۇرىشتى ەگىپ قانا قويماي, تۇقىم ءوسىرۋ, كۇرىشتى ءوڭدەۋ جۇمىسىمەن دە اينالىسامىز. ءبىزدىڭ ۇجىم ءوزىنىڭ بولاشاعىن, بارشا قازاقستاندىقتار سەكىلدى, تەك ەلباسىمەن عانا بايلانىستىرادى. سوندىقتان سايلاۋدىڭ مەرزىمىنەن بۇرىن ءوتىپ, وعان نۇرسۇلتان ءابىش ۇلىنىڭ قاتىسقانىن قالايدى. بۇل وسىعان دەيىنگى جاسالعان بارشا جۇمىستىڭ الداعى ۋاقىتتا ىركىلىسسىز جالعاسىپ, دامۋ جولىمىزدىڭ كەلەشەگىن كەمەلدەندىرە تۇسەر ەدى. ابزال ەراليەۆ, قازاقستاننىڭ ەڭبەك ەرى. قىزىلوردا وبلىسى.دۇرىس بايلام, ورىندى ۇسىنىس
قازاقستان حالقى اسسامبلەياسى كەڭەسىنىڭ پرەزيدەنتتىك سايلاۋدى مەرزىمىنەن بۇرىن وتكىزۋ تۋرالى باستاماسىن دۇرىس سانايمىز. ويتكەنى, الەم قارجى-ەكونوميكالىق داعدارىستان قالجىراپ, ساياسي-ەكونوميكالىق جاعداي تۇراقتانباي تۇرعاندا الداعى 2016 جىلى پرەزيدەنتتىك جانە پارلامەنتتىك سايلاۋلاردى وتكىزۋ جەڭىل بولمايتىنى ايان. سوندىقتان پرەزيدەنتتىك سايلاۋدى مەرزىمىنەن بۇرىن وتكىزۋ وتە دۇرىس ەكەنىن سايلاۋشى رەتىندە مويىندايمىز. « ۇلىنى ۇلى تۇتسا قۇت بولار» دەپ ماحمۇد قاشقاري اتامىز ايتقانداي, قازاقستان حالقى بۇرىنعى وتكەن سايلاۋلاردا دا ءوز كوشباسشىسىن تاڭداۋدا قاتەلىك جىبەرمەگەن ەدى. حالقىنىڭ سەنىمىنە يە بولعان نۇرسۇلتان نازارباەۆ وزىنە جۇكتەلگەن حالىق الدىنداعى پارىزى مەن مىندەتىن اسا جاۋاپكەرشىلىكپەن اتقارا وتىرىپ, ەلىمىز تاۋەلسىزدىگىنىڭ ماڭگىلىك جانە الەۋمەتتىك تۇراقتىلىعىنىڭ مىعىم بولۋى ءۇشىن ەڭبەك ەتىپ كەلەدى. قازاقستاننىڭ حالىقارالىق, گەوساياسي تۇرعىدا تانىمال بولۋىنا زور ىقپال جاساپ, قازاق حالقىن دۇنيەجۇزىنە تانىتقانىنا سۇيىسپەنشىلىكپەن قارايمىز. قازاقستان جەرىن مەكەندەيتىن جۇزدەن استام ۇلتتار مەن ۇلىس وكىلدەرىنىڭ جانە بىرنەشە ءدىني كونفەسسيالاردىڭ ءبىر-بىرىنە دەگەن سەنىمى ورناعان. ەلباسىنىڭ باستاماسىمەن قۇرىلعان قازاقستان حالقى اسسامبلەياسى بۇگىنگى تاڭدا ءوز جەمىسىن بەرىپ وتىر. بىرنەشە ۇلت وكىلدەرى تۇراتىن ءبىزدىڭ ارقالىق قالاسىندا دا ەتنوسارالىق كەلىسىم تۇراقتى. دوس قۇشاقتار ايقاسىپ, ءبىر اتانىڭ بالالارىنداي تاتۋ-ءتاتتى ءومىر ءسۇرىپ كەلەدى. ولار قازاقستاندى ءوز وتانىم دەپ ەسەپتەيدى. بۇگىنگى كۇننىڭ ەرتەڭگى تاريحتىڭ وشپەس ءبىر پاراعىنا اينالارى انىق. ەلباسىنىڭ قازاقستان حالقىنا ارناعان جولداۋىنان باستاۋ الىپ جانە ۋاقىتىنان بۇرىن ىسكە قوسىلعان «ارقالىق – شۇباركول» تەمىرجولى سارىارقا جەرىنىڭ ناق كىندىگىندە ورنالاسقان. ارقالىق قالاسىنىڭ ەكونوميكالىق-الەۋمەتتىك دامۋىنا ۇلەس قوسادى. تەك بۇگىنگى كۇننىڭ وزىندە جۇزدەگەن ادام تەمىرجول تورابىنا جۇمىسقا ورنالاستى جانە وسى جول ارقىلى پويىزدار ەرسىلى-قارسىلى تيەسىلى باعىتتا جۇك تاسىمالداۋدا. 2020 جىلعا دەيىن مونوقالالاردى دامىتۋعا ارنالعان باعدارلامانىڭ شەڭبەرىندە ارقالىققا دا ينۆەستيتسيا تارتىلدى. قالانىڭ ينفراقۇرىلىمى جاقسارىپ كەلەدى. اپاتتى جاعدايلاردا تۇرعان ۇيلەر ىسىرىلىپ تاستالدى. ەلباسىنىڭ تۇرعىن ءۇي-كوممۋنالدىق شارۋاشىلىق پەن سۋ جانە جىلۋمەن قامتاماسىز ەتۋ جەلىلەرى ينفراقۇرىلىمىن جاڭعىرتۋ تۋرالى تاپسىرماسىن ورىنداۋ ماقساتىندا وتكەن جىلى 11 تۇرعىن ءۇي كۇردەلى جوندەۋدەن وتكىزىلدى. ارقالىق حالقىنىڭ جۇرەگىندە ەرتەڭگى كۇنگە دەگەن سەنىم ۇيالادى. قالادا ورنالاسقان مەكەمەلەر مەن كاسىپورىندار, پەداگوگيكالىق ينستيتۋت پەن كوللەدجدەر, مەكتەپتەر قالىپتى جۇمىس ىستەپ تۇر. پرەزيدەنت جاڭا ەكونوميكالىق ساياساتىن جاريالاعان «نۇرلى جول – بولاشاققا باستار جول» اتتى جولداۋىندا بىزگە ءبىرىنشى رەتتە ورىندالاتىن ءىس-شارالاردى ايقىنداپ بەردى. «...الىستى جاقىن ەتۋ – بۇگىنگى جولدا ۋدىڭ ءتۇيىنى بولماق», دەگەنى بارلىق قازاقستاندىقتاردىڭ ويىنان شىقتى. كولىك-لوگيستيكالىق ينفراقۇرىلىمداردى دامىتۋ ءۇشىن بەرگەن ناقتى تاپسىرمالارى وتە ورىندى. قازاقستان ايماعىنىڭ ءوزارا بايلانىسىن جاقسارتۋ ارقىلى ەلىمىزدىڭ ىشكى الەۋەتىنىڭ ارتاتىنى ايقىن. ەلباسىمىز الداعى ۋاقىتتا حالقىمىزدىڭ ەجەلگى ارمانى – ماڭگىلىك ەل يدەياسىن جۇزەگە اسىرۋعا بەلسەنە ەڭبەك ەتەرىنە نىق سەنىمدىمىز. وسى ىستەلگەن جانە بولاشاقتا ورىندالار كەلەلى شارۋالاردى پايىمداي كەلىپ جانە ەلىمىزدىڭ كەلەشەگىنىڭ ىركىلىسسىز دامۋى ءۇشىن قازاقستان حالقى اسسامبلەيا كەڭەسىنىڭ پرەزيدەنتتىك سايلاۋدى مەرزىمىنەن بۇرىن وتكىزۋ تۋرالى شەشىمىن ءبىراۋىزدان قولدايمىز. سەيىتبەك قۋانىشباەۆ, ى.التىنسارين اتىنداعى ارقالىق مەملەكەتتىك پەداگوگيكالىق ينستيتۋتىنىڭ رەكتورى. ارقالىق.ءبىراۋىزدان قولدايمىز
بيىل پرەزيدەنتتىك سايلاۋ وتكىزۋگە ۇسىنىس جاساعان قازاقستان حالقى اسسامبلەياسى كەڭەسىنىڭ ۇندەۋىن سولتۇستىكقازاقستاندىقتار دا ءبىراۋىزدان قولداپ وتىر. بۇل باستاما جۇرتشىلىق كوكەيىندەگىنى ءدوپ باسىپ, ەرتەڭگە دەگەن ەل سەنىمىن بەكەمدەي تۇسۋدە. شىنىندا دا, الەمدە تۇراقسىزدىق ورىن العان قازىرگى كۇردەلى كەزەڭدە ناقتى تاڭداۋىمىزدان, ستراتەگيالىق باعىتىمىزدان اينىماي, قازاقستاندى جاڭعىرتۋ جانە الەمنىڭ ەڭ دامىعان 30 ەلىنىڭ قاتارىنا ەنۋ ءۇشىن ءبىز ەلباسىمىز نۇرسۇلتان نازارباەۆتىڭ توڭىرەگىنە بۇرىنعىدان دا توپتاسا تۇسەتىن بولامىز. سايلاۋدى مەرزىمىنەن بۇرىن وتكىزۋ ارقىلى ەكونوميكامىزدى ودان ءارى نىعايتۋدىڭ, جۇرگىزىلىپ وتىرعان ساياساتتىڭ ساباقتاستىعىن قامتاماسىز ەتۋدىڭ تىڭ مۇمكىندىكتەرى قاراستىرىلىپ, حالىق يگىلىگى جولىنداعى باعدارلامالاردىڭ جالعاساتىنى انىق. سوندىقتان دا بۇل باستاماعا, شىن مانىندە, باسقاداي بالاما جوق دەپ ويلايمىن. ەل ەكونوميكاسىنىڭ تۇراقتىلىعى بۇكىل قازاقستان حالقىنا ءتيىمدى. سونىڭ ىشىندە بىزدەر, جەرگىلىكتى ءونىم وندىرەتىن كاسىپكەرلەر ءوندىرىستىڭ قازىرگى داعدارىستى كەزەڭىندە كەزدەسكەن قيىنشىلىقتى ەڭسەرە وتىرىپ, تۇرعىندار تۇرمىسىن جاقسارتا تۇسەتىن وتاندىق ساپالى ونىمدەر شىعارۋعا مۇددەلىمىز. الايدا, قانداي دا ءبىر جاقسى ءىستىڭ بىردەن داڭعىل جولعا تۇسپەيتىنى سياقتى, وسى جىلدىڭ باسىندا قىزمەتىنە كىرىسكەن ەۋرازيالىق ەكونوميكالىق وداقتىڭ اياسىنداعى جۇمىستان دا كۇتەرىمىز مول. باستاپقى كەزەڭدە الەمدىك مۇناي باعاسىنىڭ قۇلدىراپ كەتۋى, باتىس ەلدەرىنىڭ رەسەي مەملەكەتىنە جاريالاعان سانكتسيالىق شارالارى كەرى اسەر ەتكەنىمەن, ۋاقىتشا قۇبىلىس ەكەنىن جاقسى تۇسىنەمىز. وسى رەتتە, ەلباسىمىز قازاقستان حالقىن «قازاقستاندا جاسالعان» ۇرانىمەن وتاندىق ونىمدەردى ناسيحاتتاۋعا بەكەرگە شاقىرىپ وتىرعان جوق. ارينە, وداق قۇرامىنا ەنگەننەن كەيىن ونىڭ تالابىنا باعىنباسقا بولمايدى. ءوزارا كەدەندىك بەكەتتىڭ الىنۋى رەسەيدىڭ ءدال قازىرگى ارزان تاۋارلارىنىڭ قازاقستان نارىعىنا جول اشىپ بەردى. وداققا مۇشە ەلدەر اراسىنداعى ساۋدا قاتىناستارى رەتتەلىپ, جالپىعا ورتاق زاڭدىلىق ارناسىنا تۇسەرى ءسوزسىز. بۇل جايىندا ەلباسىنىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا دا ايتىلدى. «ءبىزدىڭ قازىرگى ەكونوميكالىق ساياساتىمىزدىڭ باعىتى دۇرىس. كەلەڭسىزدىكتەر سىرتقى نارىقتىڭ اسەرى, قازاقستان ىشىندە ەكونوميكالىق داعدارىس جوق», – دەدى پرەزيدەنت. مەملەكەت باسشىسىنىڭ وسى سوزدەرىن بارىنشا قولداپ, قيىندىقتارعا قايىسپاي جۇمىس جاساپ جاتقان جايىمىز بار. ءبىزدىڭ «كازمياسوپرودۋكت» جشس-ءنىڭ قالا بازارلارى مەن ساۋدا ورتالىقتارىندا ءوندىرۋشىنىڭ باعاسى بويىنشا ساۋدا جاسايتىن 10 ساۋدا الاڭى جۇمىس ىستەيدى. ەت ونىمدەرىنىڭ 20-دان استام ءتۇرىن شىعارامىز. وندىرىسكە تەك جەرگىلىكتى شيكىزاتتار عانا پايدالانىلادى. دەگەنمەن, جوعارىدا اتالعان كەلەڭسىزدىكتەرگە بايلانىستى جىل باسىنان بەرى ءونىم شىعارۋ كولەمىنىڭ ەكى ەسەدەي كەمىپ كەتكەنىن دە ايتپاسقا بولمايدى. وتكەن جىلى تاۋلىگىنە ورتا ەسەپپەن 4-4,5 توننا ەت ونىمدەرىن شىعارىپ وتىرساق, بۇگىندەرى بۇل كورسەتكىش نەبارى 2 توننانى قۇرايدى. قالاداعى ەت ونىمدەرىن ءوندىرەتىن كاسىپورىنداردىڭ ىشىندە ءبىزدىڭ ءبىرشاما ءتاۋىر جاعدايدا ەكەنىمىز راس. سونىڭ وزىندە قالا سۋپەرماركەتتەرىندە وندىرىلگەن ونىمدەرىمىزدىڭ 20 پايىزى عانا وتەدى. وسى ورايدا, «قازاقستاندا جاسالعان» اكتسياسى كەڭ ءورىس تاۋىپ, سۋپەرماركەتتەر جەرگىلىكتى وندىرۋشىلەردىڭ عانا ونىمدەرىن ساتسا ەكەن دەيمىز. كاسىپورنىمىزدا ءوندىرىستىك قوندىرعىلار جاڭارتىلىپ, گەرمانيالىق قۇرال-جابدىقتار قويىلدى, اۆتوموبيل پاركى جاڭعىرتىلدى. ءبىر سوزبەن ايتقاندا, جاۋاپتى تاپسىرىستاردى ورىنداۋعا تولىق دايىنبىز. ەلباسىمىز ايتقانداي, وزىمىزدەگى نارىقتىڭ كەمىندە 50 پايىزىن جەرگىلىكتى ونىمدەرمەن جابۋعا كۇش سالۋىمىز كەرەك. وعان ءبىزدىڭ مۇمكىندىگىمىز زور. الداعى سايلاۋعا بايلانىستى ساياسي ناۋقان جەرگىلىكتى ءونىم وندىرۋشىلەردى دە جوعارى بەلەستەردەن كورىنۋگە جىگەرلەندىرەدى. وندا ءبىز ءوز قالاۋىمىزدى جاساپ, ەل ەكونوميكاسىنىڭ كوسەگەسىن كوگەرتەتىن كەمەڭگەردى تاڭدايمىز. بارشا ەل ازاماتتارىن قازاقستان رەسپۋبليكاسى پرەزيدەنتىنىڭ سايلاۋىن بيىل وتكىزۋ تۋرالى باستامانى قولداۋعا شاقىرامىز. اركادي ۆوزنيۋك, «كازمياسوپرودۋكت» جشس-ءنىڭ ديرەكتورى. سولتۇستىك قازاقستان وبلىسى.